Chikho cha Kaombe Sugar Estate achikhazikitsa ku Nsanje

Chikho cha mpira wa miyendo komanso wa manja cha Kaombe Sugar Estate achikhazikitsa m’boma la Nsanje.

Mwambo wokhazikitsa chikhochi, chomwe ndichandalama zokwana K16 million unalipo Loweruka masana pabwalo la Sorgin Community.

MORE NEWS FROM WAMPIRA

Polankhula pambali pokhazikitsa chikhochi, a Christopher Mathwes, mkulu wa kampaniyi, anati ganizo lokhazikitsa mpikisanowu linatsamira pofuna kupititsa patsogolo luso la Achinyamata m’delari.

“Monga mukudziwa m’Malawi muno muli mavuto a ntchito choncho titakhala pansi mogwirizana ndi am’nzanga tinachiona kuti ndikwabwino tikhazikitse chikhochi chimene tikukhulupilira kuti chithandizira Achinyamata ochuluka kupeza zochita.” Mathwes anafotokoza.

“Sitisiila pamenepa, tikhala tikupitiliza kukhazikitsa mipikisano ngati iyi mtsogolomu.” Anaonjezera Mathwes.

Nyakwawa Sorgin ya m’delari inayamikira kampaniyi pachikonzerochi ndipo anapempha Achinyamata kugwiritsa ntchito bwino mwayi ngati oterewu kuti uthandizire kukweza luso lawo.

A Grace Chongwe, omwe ndi mlembi wamkulu wa nthambi loyendetsa mpira m’bomali ndipo anali mlendo wolemekezeka pa mwambowu, anapempha matimu kuti asunge bata ndi mtendere ndipo anachenjeza kupereka zilango zokhwima kumatimu amene achite za mtopola mumpikisanowu.

Matimu a Kaombe Estate ndi Nyambesa FC ndiomwe anakumana pamwambo okhazikitsa chikhochi ndipo pamapeto pamasewero matimuwa sanagoletsane chigoli chilichonse.

Chikhochi, chikuyembekezeka kuseweredwa ndimatimu 32 a muzoni la Bangula omwe agawidwe m’magulu 8 momwe mukhale matimu anayi gulu lililonse ndipo matimu awiri omwe adzachite bwino mugulu lililonse ndiomwe adzadzigulire malo mundime ya kapherachoka ya matimu 16.

Pamwambowu, kampaniyi inagawanso yunifolomu kuphatikizanso mipira ku matimu asanu ndi atatu (8) omwe ndi a midzi yozungulira kampaniyi.

Ngati mbali imodzi ya ntchito yopititsa patsogolo umoyo wa anthu m’delari, kampaniyi yakhala ikuchita zitukuko zosiyanasiyana mdelari monga kumanga midadada yophunzilira, kumanga zipatala za Ana osapitilira zaka zisanu komanso kukumba zitsime mwazina.

Wolemba: Joseph Navaya Jr.